Beste NOS-studente

Ek voel dat indien jy enige klagtes het oor hoe vanoggend se 9:00 les op 13 Maart 2015 “hanteer” is, of dat Meneer Knoetze “onprofessioneel” opgetree het, vra jouself af: hoe professioneel het JY opgetree?

Ons het inbreuk gemaak op sy lesuur deur na 9:00 nog IN GROEPE ROND TE STAAN EN MET MEKAAR TE GESELS, daar is in groepe saamgedrom om ‘n opdrag in te gee wat jy na die afloop van die klas ook sou kon ingee; die dame wat dit ingeneem het vir Dr Joorst sou nêrens heen gaan nie.  Hierdie is gedoen gedurende Meneer Knoetze se lesuur.  Weereens, infringement, for what. Jy was besig met ‘n ander dosent se werk gedurende Meneer Knoetze se klas.  Hoe professioneel dink jy was dit.

Volgende; Meneer Knoetze het die klaskamer se ligte afgeskakel – dit was sy manier om ons aandag te kry – net soos daai aandagstreep. Nie net wou hy ons aandag gedurende die lesing hê nie, hy wou stilte bewerkstellig deur die lig af en weer aan te skakel, in my opinie. Di ten dat student besef hulle moet in hulle sitplekke kom.

Dit waarvoor ek my die meeste skaam is nie hoe student na die tyd gekla het en ‘n petisie begin opstel het om te kla oor Meneer Knoetze se “onprofessionalitiet” nie, maar my eie reaksie.  En wat was dit? Niks.  Ek het gedink ek moet opstaan om almal wat gepraat het stilt e maak, maar ek het nie.

Ons verwag professionaliteit en respek, maar niemand het in vandag se lesing enige respek aan Meneer Knoetse getoon nie.  Dit het ons byna 10 minute geneem om tot stilte te kom.  Indien ons soos verantwoordelike, intelligente, volwasse “grootmense” behandel wil word, moet ons so optree.  Niemand, in my opinie, het dus die reg om te kla oor die verloop van die dosent se gedrag vanoggend nie.

Indien jy een van díe is wat gepraat het – of dit nou staande in groepe was, of kliphard terwyl jy op die banke gesit het – en of jy een van diegene is wat, soos ek, net in stilte gesit en wag het vir verandering, het jy enige en alle “regte” wat jy dink jy het, verbeur.